Skip to main content
Tax advice - don’t get caught out

Arbed Treth

Rydym yma i’ch helpu i ddeall trefniadau’ch cyflog fel nad ydych yn cael unrhyw filiau treth annisgwyl.

Os ydych yn ystyried gweithio drwy gwmni ambarél, neu’n gwneud hynny eisoes, gallwn eich helpu i ddeall trefniadau eich cyflog, a sut i’w wirio fel nad ydych yn cael eich dal ar gam.  

Rydym yma i’ch helpu i adael cynllun Arbed Treth, a rhoi gwybod amdano. Gallwch gamu’n ôl ar ben ffordd, a helpu i amddiffyn eraill. 

Adnabod Arbed Treth

Gadael cynllun Arbed Treth

Gwirio eich Cwmni Ambarél

Rhoi gwybod am gynllun Arbed Treth

Adnabod Arbed Treth 

Gyda’n cymorth ni, mae adnabod Arbed Treth yn rhwydd. Efallai eich bod yn meddwl bod yn rhaid i chi fod yn arbenigwr neu ei bod hi’n anodd adnabod cynllun o’r fath. Gallwn ddangos i chi sut i amddiffyn eich hun rhag cynlluniau Arbed Treth.  

Yn aml, bydd Arbed Treth yn cynnwys trafodion artiffisial – pwrpas y rhain yw honni’n dywyllodrus eich bod yn gostwng treth.  

Os ydych wedi bod yn rhan o gynllun Arbed Treth, bydd yn rhaid i chi dalu’r dreth sydd arnoch yn gyfreithiol, yn ogystal â thalu llog. Yn anffodus, bydd hyn yn ychwanegol at unrhyw ffioedd yr ydych eisoes wedi eu talu i’r person a werthodd y cynllun i chi.  

Gallwch ddarllen eich canllaw byr i adnabod yr arwyddion o Arbed Treth. 

Gwirio eich cyflog 

Y ffordd orau o osgoi cael eich dal mewn cynllun Arbed Treth yw trwy ddeall sut yr ydych yn cael eich talu. Mae hyn yn berthnasol i bobl sy’n rhan o TWE a Hunanasesiad. 

Bydd gwirio eich slipiau cyflog a’ch trefniadau contractiol yn sicrhau eich bod yn talu’r swm cywir o Dreth Incwm a chyfraniadau Yswiriant Gwladol. Drwy wneud hyn byddwch yn osgoi cael bil treth annisgwyl yn hwyrach ymlaen. 

Mae’r pethau y bydd yn rhaid i chi fod yn wyliadwrus ohonynt yn cynnwys y canlynol: 

  • cael mwy o arian yn eich cyfrif banc na’r hyn sy’n cael ei nodi ar eich slip cyflog 
  • cael taliadau sy’n rhydd o dreth, fel benthyciadau a chyfalaf ymlaen llaw 

Dylai’r swm yr ydych yn ei gael yn eich cyfrif banc gyd-fynd â’r cyflog net sydd wedi ei nodi ar eich slip cyflog. Er mwyn deall yn well am y ffordd y dylai eich slip cyflog edrych, darllenwch ein harweiniad ar slipiau cyflog. 

Yn ogystal, gallwch ddefnyddio’r gwiriwr risgiau hwn i weld a yw’n bosibl bod unrhyw un o’ch contractau yn ymwneud ag Arbed Treth. 

Hanesion personol

Mae pawb yn gyfrifol o dan gyfraith y DU am dalu’r swm cywir o dreth. Hyd yn oed os ydych yn enwebu rhywun i ymdrin â’ch materion treth ar eich rhan ac yn cael cyngor gwael. Os byddwn yn canfod eich bod yn rhan o gynllun Arbed Treth, bydd yn rhaid i chi dalu’r dreth sydd arnoch yn gyfreithiol, yn ogystal â thalu llog. Efallai y bydd yn rhaid i chi dalu cosb hefyd. Yn anffodus, bydd hyn yn ychwanegol at unrhyw ffioedd yr ydych eisoes wedi eu talu i’r person a werthodd y cynllun i chi. 

Hanes Chantelle 

Cafodd Chantelle ei dal ar gam gan gynllun Arbed Treth. Mae hi’n nyrs o Watford. Dechreuodd Chantelle bryderu bod rhywfaint o’i chyflog o swydd gydag asiantaeth newydd yn cael ei dalu i’w chyfrif banc heb ddidynnu unrhyw dreth oddi wrtho. Cysylltodd â CThEF er mwyn cael help.  

Darllenwch hanes Chantelle ar GOV.UK.

Darllenwch drawsgrifiad o fideo Chantelle
Cafodd Chantelle ei dal wrthi mewn cynllun Arbed Treth. Mae hi’n nyrs yn Watford. Dyma’r hyn ddigwyddodd. “Gwelais i hysbyseb am bach o waith asiantaeth, ac roedden nhw’n honni eu bod wedi cael eu cymeradwyo gan CThEF. Teimlais i’n ddiogel yn cofrestru gyda nhw felly.” Aeth ychydig o fisoedd heibio, a sylweddolodd Chantelle nad oedd treth yn cael ei dynnu oddi wrth gyfran o’i chyflog. Roedd Chantelle wedi gweld yr ymgyrch Arbed Treth ‘Peidiwch â chael eich dal wrthi’. Roedd hi felly yn ymwybodol bod angen e-bostio CThEF er mwyn gwirio ei slipiau cyflog. “Dywedodd CThEF wrtha i fy mod i wedi ymuno â chynllun Arbed Treth. Fe wnaethon nhw roi gwybod i mi beth oedd angen i mi ei wneud er mwyn gadael y cynllun.” Gwnaeth Chantelle ymateb yn gyflym. Llwyddodd CThEF i weithio gyda Chantelle i setlo’r dreth oedd arni. “Roeddwn i’n teimlo fel fy mod i wedi cael fy nhwyllo gan yr asiantaeth. Rydw i’n siŵr bod yna bobl eraill yn yr un sefyllfa. Rydyn ni’n gweithio mor galed, dim ond i ddioddef o ganlyniad i’r cynlluniau hyn.” Os ydych fel Chantelle ac yn gweithio drwy asiantaeth, gwiriwch eich slipiau cyflog bob amser. Os oes rhywbeth yn ymddangos yn anghywir, cysylltwch â CThEF yn syth.

Hanes Tanya 

Mae Tanya yn rhiant sengl ac yn nyrs. Cafodd ei hannog i ymuno â chynllun Arbed Treth. Arweiniodd hynny at fil treth mawr, annisgwyl iddi. 

Darllenwch hanes Tanya ar GOV.UK.

Darllenwch drawsgrifiad o fideo Tanya
Yn fy swydd fel nyrs, rydw i’n ymddiried yn fy nghleifion, ac maen nhw’n ymddiried ynof i. Mae’n berthynas sy’n seiliedig ar ofal. Fe wnes i ddod o hyd i’r swydd drwy asiantaeth wnaeth argymell cwmni ambarél ar gyfer gwasanaethau’r gyflogres. Roeddwn i’n meddwl bod hynny yn iawn. Roeddwn i’n ymddiried yn yr asiantaeth a’r cwmni ambarél. Fe ddywedodd y ddau gelwydd wrtha i. Roeddwn i’n meddwl y byddan nhw’n gofalu amdana i, ond roeddwn i’n anghywir. Fe ddywedon nhw wrtha i i beidio poeni, a’u bod nhw am ofalu am fy holl broblemau treth cyfreithiol. Bwydon nhw’r celwyddau am fuddion o gael cyflog uwch, ond yn y pen draw roedd arna i arian i CThEF. Yna, golchodd y cwmni ambarél eu dwylo ohonof i. Diflannodd y cwmni, gan fy ngadael ar fy mhen fy hun i dalu’r bil.

Hanes Duncan

Mae Duncan yn Rheolwr Prosiect yn y maes TG. Penderfynodd ddefnyddio cwmni ambarél er mwyn ei helpu gyda gweinyddu ei gyflogres. Nid oedd yn gwirio’r manylion, ac fe ymunodd â chynllun Arbed Treth yn y diwedd.  

Darllenwch hanes Duncan ar GOV.UK.

Darllenwch drawsgrifiad o fideo Duncan
Pan ddechreuais i weithio fel contractwr TG, roeddwn i’n ystyried defnyddio cwmni ambarél er mwyn rheoli fy nghyflogres. Fe wnes i chwilio ar y we am gwmnïau ambarél, ac fe ddes i ar draws gwefan oedd yn cymharu gwahanol gwmnïau ambarél. Roedd hi mor syml – dewisais i un o’r cwmnïau, ac fe wnaeth y cwmni sefydlu pethau i mi. Ces i ychydig o nosweithiau di-gwsg i ddechrau. Dyna oedd y rhan waethaf. Siaradais â rhywun yn CThEF ac fe wnaeth hynny dawelu pethau. Yn ffodus i mi, nid oeddwn i wedi gwario fy arian i gyd, ac roeddwn i wedi cadw rhywfaint ohono. Cefais fil treth poenus, ond erbyn hynny roeddwn i’n ei ddisgwyl ac felly ces i gyfle i baratoi ar ei gyfer.

Gadael Cynllun Arbed Treth 

Os ydych o’r farn eich bod efallai yn rhan o gynllun Arbed Treth, cysylltwch â ni cyn gynted â phosibl. Byddwn yn eich cynorthwyo. Gallwn roi cymorth i chi adael y cynllun a setlo’ch materion treth. 

Nid anwybyddu’r broblem yw’r ateb cywir. Po hiraf y byddwch yn gadael y broblem heb ei datrys, y mwyaf fydd y bil treth. 

Ein nod yw eich cael yn ôl ar y trywydd cywir. Ni fyddwn yn barnu – dim ond cynnig y cymorth sydd ei angen arnoch. Os na allwch fforddio talu popeth ar un tro, efallai y byddwn yn gallu cynnig trefniant talu fesul rhandaliad i chi. 

I gael rhagor o wybodaeth, darllenwch yr arweiniad ar  Arbed Treth: gadael cynllun arbed treth. 

Gwirio eich Cwmni Ambarél 

Y ffordd orau o osgoi defnyddio cwmni ambarél sy’n gweithredu cynllun Arbed Treth yw trwy ddeall sut yr ydych yn cael eich talu. 

Bydd gwirio eich slipiau cyflog a’ch trefniadau contractiol yn sicrhau eich bod yn talu’r swm cywir o Dreth Incwm ac Yswiriant Gwladol. 

Gallwch ddefnyddio ein hofferyn ‘cyfrifo cyflog o gwmni ambarél’ er mwyn cyfrifo’r cyflog y dylech ei gael. 

Er mwyn deall yn well am y ffordd y dylai eich slip cyflog edrych, darllenwch ein harweiniad ar slipiau cyflog.

P’un a ydych chi eisoes yn gweithio drwy gwmni ambarél, neu’n meddwl am gofrestru gydag un, dylech wirio’r cynlluniau Arbed Treth yr ydym wedi eu henwi. 

Er mwyn cael rhagor o gyngor ar gwmnïau ambarél: Darllenwch ein harweiniad ar sut beth yw gweithio drwy gwmni ambarél, a sut y byddwch yn cael eich talu. 

Cwmnïau ambarél – deall sut maent yn gweithio 

Os ydych yn gontractwr, mae’n bosibl y cewch eich cyflogi drwy ‘gwmni ambarél’. Os ydych yn ansicr, mae’n syniad da i chi wirio, gan fod rhai cwmnïau ambarél yn ceisio torri’r rheolau treth. 

Mae’n bosibl eich bod o dan berygl eich hun. Ond drwy ddeall sut mae cwmnïau ambarél yn gweithio, gallwch gymryd camau er mwyn osgoi’r risgiau hyn. 

Darllenwch ein harweiniad ar sut beth yw gweithio drwy gwmni ambarél, a sut y byddwch yn cael eich talu. 

Rhoi gwybod am gynllun Arbed Treth 

Rhoi gwybod am gynllun Arbed Treth 

Cysylltwch â ni os yw un o’r canlynol yn berthnasol: 

  • rydych wedi cael eich annog i ymuno â chynllun Arbed Treth 
  • rydych yn ymwybodol o gynllun Arbed Treth 
  • rydych am roi gwybod i ni am rywun sy’n gwerthu cynlluniau Arbed Treth 
Gallwch roi gwybod i CThEF am gynllun amheus yma 

Gallwch wneud hynny yn anhysbys os yw’n well gennych – nid oes yn rhaid i chi roi eich enw, eich cyfeiriad na’ch cyfeiriad e-bost. Sicrhewch eich bod yn nodi’r cod ‘TAC’ wrth lenwi’r ffurflen. 

Gallwch hefyd ffonio CThEF ar 0800 788 887. Os ydych y tu allan i’r DU, ffoniwch +44 (0)203 0800 871. 

Rhowch eich barn 

Hoffwn ni glywed eich barn am yr wybodaeth ar y dudalen hon, ac ar GOV.UK. Gallwn wedyn wella ansawdd a pherthnasedd yr wybodaeth rydyn ni’n rhoi yn y dyfodol. 

Bydd yr arolwg hwn yn cymryd tua 5 munud i’w lenwi. Mae atebion yn ddienw – fyddwn ni ddim yn gofyn i chi nodi unrhyw wybodaeth bersonol a fyddai’n datgelu pwy ydych chi. 

Llenwch ein harolwg byr 

Rhagor o wybodaeth

Mae gennym yr adnoddau a’r arweiniad canlynol ar Arbed Treth:  

  • Spotlight 60 – gwybodaeth am drefniadau Arbed Treth sy’n cael eu defnyddio gan rai cwmnïau ambarél 
  • Spotlight 55 – dysgu’r hyn sydd angen i chi feddwl amdano cyn defnyddio cwmni ambarél er mwyn sicrhau ei fod yn dilyn rheolau treth 
  • Safonau CThEF ar gyfer asiantau – mae disgwyl i bob asiant ac ymgynghorydd sy’n cael ei dalu, boed wedi’i leoli yn y DU ai peidio, fodloni’r safonau hyn.