Hawlio Treuliau Gwaith
Gwiriwch eich bod yn gymwys a mynd ati i hawlio treuliau gwaith yn uniongyrchol gyda CThEF am ddim.
Peidiwch â chael eich dal wrthi drwy ddilyn hysbysebion ar-lein a chwmnïau ad-dalu treth sy’n cynnig gwneud hawliadau treuliau gwaith ar eich rhan fel y gallant hawlio comisiwn. Os yw’n ymddangos nad ydych yn gymwys i hawlio, rydych yn dal i fod yn gyfrifol am unrhyw hawliadau a wnaed ar eich rhan.
Byddwn yn eich helpu i ddeall sut i wirio’r canlynol:
- a ydych yn gymwys i hawlio
- yr hyn y gallwch ei hawlio
- yr hyn na allwch ei hawlio
- sut i hawlio’n uniongyrchol gyda CThEF
Chi fydd yn cael cadw 100% o’r arian sy’n ddyledus i chi os ydych yn gymwys.
Gwirio
Dysgu am yr hyn y gallwch ei hawlio fel treuliau gwaith, a’r hyn na allwch ei hawlio.
Adnabod
Adnabod arwyddion cyngor treth gwael.
Hawlio
Hawlio’n uniongyrchol gyda CThEF.
Gwirio’r hyn y gallwch ei hawlio fel treuliau gwaith, a’r hyn na allwch ei hawlio
Os ydych yn bodloni’r meini prawf cymhwystra, mae’n bosibl y gallwch hawlio rhyddhad treth am y mathau canlynol o dreuliau gwaith:
- Gweithio gartref
- Gwisgoedd unffurf, dillad gwaith ac offer
- Cerbydau rydych yn eu defnyddio ar gyfer gwaith
- Tanysgrifiadau a ffioedd proffesiynol
- Teithio, cynhaliaeth, a threuliau dros nos
- Prynu offer eraill
Yn gyntaf, bydd yn rhaid i chi ailwirio a ydych yn gymwys er mwyn osgoi cael eich dal wrthi. Dewch o hyd i ragor o wybodaeth am yr hyn y gallwch ei hawlio, a’r hyn na allwch ei hawlio, a sut i hawlio rhyddhad treth ar eich treuliau swydd ar GOV.UK.
Nid yw’n cymryd llawer o amser i wirio. Gallai arbed cryn dipyn o amser ac arian i chi yn hwyrach ymlaen. Felly, gwiriwch bob amser a ydych yn gymwys cyn gwneud hawliad.
Sicrhewch fod eich hawliadau yn ddilys, hyd yn oed os ydych yn dewis defnyddio cwmni ad-dalu treth neu asiant. Bydd yn rhaid i chi ad-dalu unrhyw hawliad anghywir i CThEF yn hwyrach ymlaen. Mae gwneud hawliadau anghywir yn gallu arwain at CThEF yn cymryd camau pellach.
Y prif resymau dros hawliadau annilys am dreuliau gwaith
Mae sawl peth na allwch hawlio. Er enghraifft, ni allwch hawlio am unrhyw dreuliau sydd wedi cael eu had-dalu eisoes gan eich cyflogwr.
Cymerwch gip olwg ar y rhesymau mwyaf cyffredin dros hawliadau annilys am dreuliau (cliciwch i ehangu):
Teithio a threuliau dros nos
Ni allwch hawlio’r canlynol:
- teithio i’ch gweithle arferol, ac oddi yno
- cost cinio pan fyddwch yn teithio i’ch gweithle arferol. Dim ond pan fyddwch yn teithio i weithle dros dro y cewch hawlio treuliau bwyd a diod
- bwyd y byddwch yn dod gyda chi o’ch cartref pan fyddwch yn teithio i weithle dros dro. Dim ond cost y bwyd y gwnaethoch dalu amdano yn ystod eich amser i ffwrdd y cewch hawlio
Gweithio gartref
Ni allwch hawlio’r canlynol:
- costau gweithio gartref pan fyddwch wedi’ch lleoli mewn swyddfa, ond rydych yn dewis peidio gweithio yno. Os yw eich contract cyflogaeth yn caniatáu i chi weithio gartref drwy’r amser, neu rywfaint o’r amser, er enghraifft fel rhan o drefniadau gweithio hyblyg, yna ni fyddwch yn gymwys ar gyfer y rhyddhad hwn
- newidiodd y cymhwystra ar gyfer y rhyddhad ‘gweithio gartref’ ar ôl i bandemig COVID-19 ddod i ben. Nid yw’r ffaith yr oeddech yn gymwys i hawlio ar yr adeg honno yn golygu eich bod yn dal i fod yn gymwys i hawlio
Gwisgoedd unffurf, dillad gwaith ac offer
Ni allwch hawlio’r canlynol:
- treuliau ar gyfer gwisg unffurf, dillad neu offer sydd wedi cael eu darparu eisoes gan gyflogwr. Mae hyn yn cynnwys os byddwch yn dewis prynu rhai o ‘ansawdd gwell’ i’r rhai a gawsoch gan eich cyflogwr
- costau golchi eich gwisg unffurf os oes gan eich cyflogwr gyfleuster golchi dillad a’ch bod yn dewis peidio ei ddefnyddio, er enghraifft, drwy olchi eich gwisg unffurf adref
- dillad gwaith sydd heb logo amlwg. Er enghraifft, os yw’ch cyflogwr yn eich cynghori i wisgo du i gyd, nid yw hyn yn draul gymwys
Tanysgrifiadau a ffioedd proffesiynol
Ni allwch hawlio’r canlynol:
- ffioedd undeb – nid yw’r rhain yn dreuliau caniataol, yn wahanol i rai ffioedd aelodaeth broffesiynol
Cewch gip olwg ar y ffordd fwyaf priodol i chi hawlio treuliau gwaith os ydych yn gymwys drwy ddefnyddio’r offeryn gwirio cymhwystra sydd gennym.
Adnabod arwyddion cyngor gwael
Os oes rhywun yn cynnig yr addewid o arian hawdd i’w gael, a’i fod yn ymddangos yn rhy dda i fod yn wir, mae hi’n bur debyg ei fod felly.
Drwy drosglwyddo eich gwybodaeth bersonol, efallai bydd yn rhaid i chi ad-dalu cyfanswm unrhyw hawliad annilys a wnaed ar eich rhan. Bydd y cyfanswm hwn yn cynnwys unrhyw gomisiwn sydd eisoes wedi ei gymryd gan asiant.
Cyn defnyddio cwmni ad-dalu treth neu asiant treth ar gyfer ad-daliadau, ymchwiliwch a chymerwch eich amser. Os ydych yn dewis defnyddio asiant i weithredu ar eich rhan, gallwch ddarllen rhagor o wybodaeth am sut i ddewis asiant treth ar GOV.UK.
Dewch o hyd i’r pethau i fod yn wyliadwrus isod (cliciwch i ehangu):
Gwiriwch adolygiadau gan gwsmeriaid eraill
Chwiliwch am adborth ar-lein am brofiadau cwsmeriaid eraill.
Mae hi’n syniad da ymchwilio i weld a ydynt wedi cael eu hachredu gan gorff proffesiynol fel Sefydliad Cyfrifwyr Siartredig Cymru a Lloegr neu Sefydliad Siartredig Trethiant.
Darllenwch y print mân
Hyd yn oed os yw asiant yn ymddangos yn ddilys, mae’n bwysig i chi ddarllen y telerau a’r amodau bob tro.
Os oes gofyn i chi lofnodi ymwadiad (disclaimer), sicrhewch eich bod yn ei ddarllen yn ofalus ac yn deall yn llwyr unrhyw ffioedd bydd yr asiant yn eu codi.
Cofiwch – rydych yn dal i fod yn gyfrifol am unrhyw hawliad a gaiff ei wneud ar eich rhan, hyd yn oed os ydych yn dewis defnyddio cwmni ad-dalu treth neu asiant treth.
Wrth arwyddo cytundeb ag asiant, efallai eich bod yn gofyn iddynt eich cynrychioli’n gyfreithiol yn eich holl faterion treth – hyd yn oed yn bell ar ôl i’r hawliad gael ei wneud.
Gofalwch am rybuddion bod rhywbeth o’i le
Y peth pwysicaf i gofio yw peidiwch â llofnodi Ffurflen Dreth wag a’i rhoi i’ch asiant treth i’w llenwi. Gwiriwch bob Ffurflen Dreth cyn ei chymeradwyo.
Dylai asiant ofyn am dderbyniadau bob amser. Ni ddylai byth ofyn i chi ddatgelu eich dynodydd defnyddiwr ar gyfer Porth y Llywodraeth.
Ni fydd CThEF byth yn cymeradwyo asiant.
Hawlio’n uniongyrchol gyda CThEF
Mae hawlio treuliau gwaith yn uniongyrchol gyda ni drwy GOV.UK yn ffordd gyflym, syml, ac mae’n rhad ac am ddim.
Ni fydd yn rhaid i chi dalu unrhyw ffioedd i asiant na chomisiwn wrth wneud hyn eich hun.
Ar gyfer y mwyafrif o hawliadau am dreuliau, bydd angen i chi uwchlwytho tystiolaeth i ategu’ch hawliad.
Bydd y dystiolaeth sydd ei hangen yn amrywio yn dibynnu ar y math o draul rydych yn ei hawlio. Gan ddefnyddio ein tudalen gwirio cymhwystra, mae gwirio pa dystiolaeth sydd ei hangen yn gyfleus. Gallwch gyflwyno eich hawliad a’ch tystiolaeth ar-lein neu drwy’r post.
Dyma bum peth i chi gadw yng nghof cyn hawlio
✔ A oes gennych dystiolaeth i ategu’ch hawliad am draul? Mae’n bosibl y bydd gofyn i gwsmeriaid sydd am hawlio treuliau gwaith ddarparu tystiolaeth ategol er mwyn profi eu cymhwystra cyn i ni barhau â’r hawliad.
✔ Ni fydd rhyddhad treth ar dreuliau o reidrwydd yn arwain at ad-daliad. Caiff rhai treuliau eu codio yn awtomatig i’r flwyddyn ganlynol – gwiriwch fod eich cod treth yn dal i fod yn gywir.
✔ Mae’n rhaid i dreuliau fod yn berthnasol i’r gwaith yn gyfan gwbl, ac yn angenrheidiol i chi wneud y gwaith. Ni allwch hawlio am unrhyw dreuliau sydd wedi cael eu had-dalu eisoes gan eich cyflogwr.
✔ Os oedd gennych hawliad cymwys yn eich swydd flaenorol, ond bod telerau eich swydd newydd yn wahanol, yna mae’n bosibl bod gennych eitemau anghywir yn eich cod treth.
✔ Os yw’ch treuliau yn llai na £2,500, a’ch bod yn llenwi Ffurflen Dreth Hunanasesiad, mae ffordd i chi arbed amser drwy ddefnyddio ein gwasanaeth digidol i hawlio’n gyflym. Gwiriwch a ydych yn gymwys drwy ddefnyddio ein Gwiriwr Cymhwystra.
Hanesion personol
Mae’r stori hon yn ddamcaniaethol ac wedi cael ei greu fel enghraifft yn unig, ond mae’r stori yn seiliedig ar brofiadau go iawn. Mae unrhyw debygrwydd i unigolyn yn gwbl ddamweiniol.
Mae Mike yn weithiwr gofal iechyd. Mae cyd-weithiwr yn awgrymu dylai Mike ddefnyddio cwmni ad-dalu treuliau gwisg unffurf er mwyn hawlio ychydig o arian yn ôl gan CThEF.
Mae Mike yn defnyddio’r gyfrifiannell ad-dalu sydd ar wefan y cwmni. Mae’r gyfrifiannell yn awgrymu y gallai hawlio £200 yn ôl gan CThEF fel treuliau sy’n berthnasol i’w waith.
Yn nes ymlaen, mae’r cwmni yn cymryd ffi o £80 o’r £200 yr oedd CThEF wedi’i ad-dalu. Er ei fod wedi cael ei synnu gan ffi uchel y cwmni, mae Mike yn fodlon ar yr arian ychwanegol.
Flwyddyn yn ddiweddarach, mae CThEF yn rhoi gwybod i Mike nad oedd yn gymwys ar gyfer y treuliau a hawliwyd ar ei ran. Mae’n rhaid iddo dalu’r £200 yn ôl, yn ogystal â llog.
Cliciwch i ddarllen rhagor
Cafodd Mike sioc wrth glywed hyn. Sylweddolodd nad oedd yn gymwys i adhawlio’r ffi gan y cwmni gan ei fod wedi llofnodi ‘cytundeb trydydd parti’.
Yn y pen draw, Mike oedd yn gyfrifol am ei faterion treth ei hun, er iddo ddefnyddio cwmni i hawlio ar ei ran.
Ar ôl siarad â CThEF, sylweddolodd Mike bod rhai rhybuddion bod rhywbeth o’i le. Bachu ar y cyfle i ennill comisiwn oedd unig fwriad y cwmni, a hynny heb wirio os oedd ef yn gymwys. I ddechrau, ni wnaeth y cwmni ofyn am gael gweld unrhyw dderbyniadau fel tystiolaeth o gostau gweithio. Yn ogystal, ni wnaeth y cwmni gadarnhau pa dreuliau yr oeddent yn eu hawlio ar ei ran.
Mae Mike yn difaru peidio cymryd mwy o sylw er mwyn osgoi cael ei ddal wrthi gan gyngor treth gwael.
Erbyn hyn, mae Mike yn atgoffa ei gydweithwyr i wirio a ydynt yn gymwys ar gyfer treuliau sy’n berthnasol i’w gwaith â CThEF bob amser. Dylent wneud hyn hyd yn oed os ydynt yn defnyddio cwmni ad-dalu treth.
Mae Sam yn gweithio fel Gweithredwr Marchnata i gwmni lletygarwch.
Un noson, wrth edrych drwy’r cyfryngau cymdeithasol, mae Sam yn gweld hysbyseb sy’n honni y gallai fod yn gymwys i hawlio hyd at £1,500 o dreuliau teithio, cynhaliaeth, a threuliau dros nos. Roedd hon yn hysbyseb gan gwmni a oedd yn honni ei fod yn gallu helpu gweithwyr i adhawlio arian am amrywiaeth o dreuliau sy’n berthnasol i’w gwaith.
Ar y diwrnod canlynol, fe wnaeth Sam roi gwybod am yr hysbyseb i’w chydweithwraig, Tara. Fe wnaeth Tara rybuddio Sam rhag cysylltu â’r cwmni. Roedd Tara yn cofio gweld hysbyseb gan CThEF ynghylch ei ymgais ‘Peidiwch â chael eich dal wrthi’. Roedd hi’n cofio’r neges: Os ydych yn gyflogai, mae’r mwyafrif o dreuliau yn cael eu had-dalu drwy’ch cyflogwr.
Cliciwch i ddarllen rhagor
Yn dilyn y cyngor hwn, aeth Sam i ymweld â gwefan GOV.UK, ac roedd hi’n gallu cadarnhau’r hyn a ddywedodd Tara wrthi. Golyga hyn ei bod wedi osgoi gwneud camgymeriad costus iawn.
Erbyn hyn, mae Sam yn ymwybodol bod y rhyddhadau treth dilys sydd ar gael i gyflogai yn aml yn llawer llai mewn gwerth na’r hyn â ddywedodd cwmni’r hysbyseb wrthi. Mae hi hefyd yn deall bod modd gwneud hawliadau yn uniongyrchol drwy sianeli swyddogol CThEF.
Rhowch wybod
Os ydych wedi defnyddio cwmni ad-dalu treth, ac rydych o’r farn ei fod wedi gwneud ad-daliad treth annilys ar eich rhan, cysylltwch â ni fel y gallwn helpu. Byddwn yn cynnig cymorth ychwanegol i gwsmeriaid sydd ei angen.
Er mwyn cywiro hawliad am ad-dalu treth, cysylltwch â ni drwy’r dudalen sydd ar GOV.UK – Treth Incwm, Hunanasesiad a mwy.
Rhowch eich barn
Hoffwn ni glywed eich meddyliau am yr wybodaeth ar y dudalen hon. Gallwn ni wedyn wella ansawdd a pherthnasedd yr wybodaeth rydyn ni’n rhoi yn y dyfodol.
Bydd yr arolwg hwn yn cymryd tua 5 munud i’w lenwi. Mae atebion yn ddienw – fyddwn ni ddim yn gofyn i chi nodi unrhyw wybodaeth bersonol a fyddai’n datgelu pwy ydych chi.
Lawrlwythwch ap CThEF i gadw trefn eich arian a’ch treth.